... فى عشق التفاصيل \ ماضى ...

لما بفتح درج دولابى وادور فى حاجاتى القديمة ... يمكن احس نفسى كنت تافهة ... ساعات أحس انى بالبساطة كنت عايشة , واللى لسة طابع منها جزء فيا - لحد دلوقتى -

لما لقيت مركب ورق صغير , وافتكرته بموقفه ... يوم ما كنا راجعين من درس وعيل فى الشارع بيوزع ورق اعلانات عند المعدية قبل ما نعدى للبر التانى ... واديت الورقة لصاحبتى وقامت عملاهالى مركب صغير 
لما لقيت كروت صغيرة كتير وكل واحدة فيها رسالة , وافتكرت برضو مواقفها ... افتكرت كل رسالة منهم وكانت ليه ... لما كان ليا أعز صديقة - ف الوقت دا بس حسيت يعنى ايه صداقة اللى بيقولوا عليا أكتر من الاخوات - 
بس ملحقتش أتهنى بالذكريات دى لان فى شنطة صغيرة - كانت شنطة فستان بحبه وانا صغيرة - لقيت نفس الرسايل بس كانت متقطعة كتير , وافتكرت برضو ليه هي كدا ... 

لما افتكرت انى اتخدعت فى أعز صديقة ليا - ولسة مصدقة دا - وانى زهقت فى يومها بعدها وقطعت كل حاجة منها كانت بعتهالى 
بس اللى خلى الرسايل سليمة مرة تانية , انى حبيت أحتفظ بذكراها الكويسة ورجعت جبت نفس شكل الكروت وكتبتهم كلمة كلمة , بخطها ...
عادى بقى احنا كنا اصحاب أوى ونعرف خط بعض كويس ونعرف نقلده كويس

دا غير حروف اسمك الكتيرة ... بجمعها بأى طريقة وبأى شكل ... وبعملها ورق ساعات يعنى

وغير شوية حاجات صغيرة كدا ملهاش علاقة بأى حاجة غير انى بحب شكلها ...