حضن وأمان

بقلب فى التليفزيون , فلقيت مسلسل حكايات بنات ... مع انى سمعته قبل كدا أكتر من مرة ... لقيت الحتة اللى كاميليا فيها اتطلقت من جوزها وأحلام راحتلها ... لما قالتلها احضنينى يا أحلام 
افتكرت موقف , ومش عارفة ليه دا جه فى بالى يعنى 
كنت داخلة أعمل أعملية فى سنانى وكدا , وكانوا مغطين عينيا علشان الأشعة بتاع الجهاز متجيش فى عينى ... وماما مكنتش معايا علشان نزلوها تدفع شوية فلوس وكدا ... واصحابى جولى وقفوا جنبى ... سمعت صوت هاجر صاحبتى ... ناديت عليها , وقولتلها هاجر متسيبينيش , أنا خايفة أوى ... ومسكت فى ايديها مكنتش عايزة أسيبها 
حسيت بلحظة أمان ...
حاجات صغيرة كدا ممكن ترجعلنا إحساس الأمان ... حضن بتبقى محتاجه أوى , بس مش بتعرف تطلبه ... بتستنى اللى يحس بيك ويحضنك لواحده ويرجعلك الأمان فى حضنه ... 
يعنى كان وقتها لما مسكت ايد هاجر أوى , ادانى إحساس انى حضنتها أوى ... وأنا عمرى ما طلبت من حد انه يحضنى